Seņ nikas nabeja raksteits. Tod nu tagad byus juoatsuok tū dareit i vysmoz eisumā ari tagad juopastuosta, kas nūteik. Provizoriskī dati stuosta, ka 11.Saeimys vieliešonuos nu Latgolys ZRP saroksta ībolsuoti diveji cylvāki: G.Igauņs i jiusu padeveigais kolps – ituo dīnroksta autors.

Vysa pyrms paļdis par atbolstu! PAĻDIS* i reizē ari muna apsajimšona maksimali gūdpruoteigai piļdeit jaunūs pīnuokumus. Kai reize par tū visi vaicoj, kod ta suokšu jaunū dorbu? Eisumā izskaidruošu niu izaveidovušu situaceji. Pagaidam ir zyomi tikai provizoriskī rezuļtati, kurus CVK apstyprynuos gon jau ka tyvuokūs dīnu laikā (cik saprūtu, jīm tys juoizdora 3 nedeļu laikā nu vieliešonu dīnys, var dreižuok, bet izaver, ka nivīns tī nikur nagryb skrīt) – vēļ teikūt puorbaudeitys vysys īspiejamuos i naīspiejamuos klaidys, lai, nadūd Dīvs, nīvīnam piec tam nazarostu koč mozuokuos šuorbys (šaubys) par rezuļtatu pareizeibu. Piec rezuļtatu oficialys apstyprynuošonys lykuma kuorteibā vēļ tiks dūtys 4 dīnys pretenzeju īsnīgšonai i tikai tod jaunai Saeimai byus pyrmuo saīšona – tam juonūteikūt na vāluok par 17.oktobri (mieneša laikā nu uorkuortys vieliešonu datuma). Iz reiz varu aplīcynuot, ka obejis nu Latgolys ībolsuotī ZRP deputati ir apsajemuši svineigū sūlejumu Saeimys nomā saceit latgaliski.

Paļdis visim 17 kolegom nu ZRP Latgolys saroksta – cyts vairuok, cyts mozuok, vīnā voi ūtrā veidā, bet ir veicynovs kūpeiguo rezuļtata īgiušonu. Kai vysod rūnās spekulacejis „varie byut lobuok” – varie, bet tai pat ir sasnīgta gūdpylnuo 2.vīta Latgolys vieliešonu apgobolā i ir vysys īspiejis piec 3 godim (ka natiks pījimts vēļ kaids uorkuortejs lāmums) – nuokamajuos Saeimys vieliešonuos paruodeit lobuoku rezuļtatu. Lai tai byutu, obejim Latgolys puorstuovim tymā Reigys nomā byus juostruodoj ar pylnu jaudu, kai ari juoveicynoj Latgolys sabīdreibys vēļ plašuoka īsasaisteišona kūpeigā dorbā – pavysam dreiž ari gaidomys nuokamuos pašvaļdeibu vieliešonys, iz kurom juosuoc gatavētīs jau tagad.

Koalicejis veiduošonys sarunys nūteik ar pylnu jaudu. ZRP ir atguojs ar Latvejā vēļ nabejušu dorba princypu– vysa pyrms juorunoj par konkretim veicamajim dorbim, tikai tod da golam izlemt par sadarbeibys partnerim i vysa golā tod jau lemt par konkretim uzvuordim omotu piļdeišonys vītuos i tai tuoļuok. Ka gūdeigi, tod personeigi skaitu, ka byutu juoveidoj maksimali plašu spāku apvīnuošona. Tū varu pamatuot ar vairuokim argumentim (juojem vārā, ka izpildvara i liemiejvara nav vīns i tys pats; izpildvarai nav politisku, bet pamatā saimnīcisku vaicuojumu izskateišonys dorbs; plaša apsavīnuošona vaļsts atteisteibai, a na šauru politisku mierķu eistynuošonai, paruodeitu pīvadumu myusu pošu sabīdreibai i uorzemu ekspertim, ka Latveja ir gotova jaunam raisteibys ceļam), bet izaver, ka vīnu voi ūtru īmaslu dieļ, tūmār myusim otkon byus tikai 3 politisku parteju sadarbeibys modeļs vaļdeibys atbolstam. Kaidā kombinacejā? Sadarbeiba ar VL voi sadarbeiba ar SC… Tū jiusim pagaidam nivīns navarēs pasceit – nūteik sarunys, kai jau īprīšk raksteju – vysa pyrms raugūt izstruoduot skaidru i pamatuotu vaļdeibys daklaraceji ar skaidrim izpyldamim i izmierejamim dorbim vysaiduokuos sferuos: ekonomika, izgleiteiba, sabīdreiba… Dīvamžāļ pagaidam itamuos sarunuos vēļ nav tykuši leidz satiksmes i regionaluos atteisteibys vaicuojumu saskaņuošonai, bet kotrā gadejumā ZRP ir publiski nūruodejuse, ka regionu vaicuojumi ir vīna nu svareiguokajom prioritatem.

Gols golā – īspiejami dreiž byus juoreikoj kūpeigys sasatikšonys Latgolā, lai kūpeigi varātu sprīst par tuoluokajim dorbim i tod ari panuokt tūs eistynuošonu kotrā pašvaļdeibā, Latgolys regionā i Latvejā kūpumā!
Personeigi raudziešu vysmoz reizi nedelī saraksteit kaidu informaceji par aktualitatem taida dīnroksta veidā, kai itais, kai ari maksimali byut pīejams iz sarunom i konkretu prīšklykumu uzklauseišonai kai kluotinē, tai elektroniski: jureits@jureits.lv

*Eipašs paļdis Ilgai Šuplinskai, Guntim Rasimam, Juoņam Rimicānam, Arņam Slobožaninam, Valentinam Lukaševičam, Ingaram Gusānam, Raimondam Niperam i daudzim, daudzim citim, kas ar sovu atbolstu byutiski ītekmeja pādejūs puors mienešu nūtykumus.